വിശുദ്ധ പുരാണം..

ഒരു പെണ്ണ് പറഞ്ഞു. വില്‍ക്കാനുണ്ട് ബ്ലോഗുകളെന്ന്.. ബ്ലോഗ് കിലോയ്ക്കെത്രയാണ് ? അറിവുള്ളവര്‍ പറഞ്ഞു തരട്ടെ.

കൈനോട്ടക്കാരു പറയുന്നതുപോലെ ഒരു പാടുകാര്യങ്ങള്‍ പറയാനുണ്ട്. സ്മരണകള്‍ ഒത്തിരിയുണ്ട്. വീര ശൂര പരാക്രമങ്ങള്‍ അതിലേറെയുണ്ട്. സാമ്പത്തിക മാന്ദ്യമല്ലേ.. വെറുതെയിരിക്കുകയല്ലേ. വിടാതെ എല്ലാമെഴുതാം.

നല്ല സാഹിത്യകാരന്മാരൊന്നും ബ്ലോഗെഴുതില്ലത്രേ. പൊയ്ത്തുംകടവനെപ്പോലെയുള്ള ചില എഴുത്തുകാര്‍ ബ്ലോഗെഴുതാന്‍ കൂലിക്ക് ആളെ വെച്ചിട്ടുണ്ടെന്ന് കേട്ടു. ഒരു കവിതയ്ക്ക് ഇത്ര ഒരു കഥയ്ക്ക് ഇത്ര എന്ന കണക്കിലാണ് കൂലി. മമ്മുട്ടിയെപ്പോലെയുള്ളവര്‍ക്ക് ബ്ലോഗെഴുതിക്കൊടുക്കാന്‍ മോഹന്‍ലാലിന്റെ സിനിമയുടെ ആദ്യ ഷോയ്ക്ക് ടിക്കറ്റെടുക്കാന്‍ നില്‍ക്കുന്നവരുടെ ക്യൂവിനേക്കാള്‍ വലിയ ക്യൂവണെന്ന് കേട്ടു. അമേരിക്കയിലും മറ്റും ബ്ലോഗെഴുതുന്നവര്‍ക്ക് ഡോളറുകണക്കിലാണ് കൂലി. (പിച്ചക്കാര്‍ക്ക് ബ്ലോഗെഴുത്തുകാരേക്കാള്‍ കൂടുതല്‍ കിട്ടുന്നുണ്ടെന്നറിഞ്ഞ് പലരും ബ്ലോഗെഴുത്ത് നിര്‍ത്തിയത്രേ ! )

വെറുതെയല്ല, ബ്ലോഗെഴുതുന്നവര്‍ക്ക് ഗവര്‍മെന്റ് പെന്‍ഷന്‍ നല്‍കുമെന്ന് പറയുന്നത്. അഖില കേരള ബ്ലോഗെഴുത്ത് കോംഗ്രസ് പ്രസിഡന്റോ റെവല്യൂഷണറി ബ്ലോഗെഴുത്ത് പാ‍ര്‍ട്ടി സെക്രട്ടറിയോ ആയി ഇനിയുള്ള കാലം ഈ ഞാന്‍ ഒതുങ്ങിക്കൂടിക്കോളാം..